SAPOR seu SAPORES I

SAPOR seu SAPORES I.

Persarum Rex II. post Artaxerxem, A. C. 242. cruoris avidus, notissimus cladibus ab Imperatorib. Romanis acceptis et illatis. Vastavit Mesopotamiam, Syriam, Ciliciam, aliasque Imperii provincias, totum Orientem subacturus, nisi Odenatus Dux primo, dein Rex Palmyrenorum, eius conatibus obicem posuisset. Gordianus Imperator eum in regnum suum redire compulit, quo a Philippo occiso; hic cum Sapore pacem iniit, qui Antiochiâ potitus est, A. C. 252. maxime tamen insignis fuit victoria de Valeriano Imperatore parta; quem proditione Macrini vel Macriani bellô captum misere habuit, ut quoties currum con- scenderet, eius humeris pedibus inniteretur, tandem vivum excoriari, sale vulneribus inspersô, iussit: Hunc nihilominus Odenatus et Zenobia, Nisibe, Carris, aliisque urbibus occupatis, saepe vicerunt, praecipuis eius ducibus captivis, ad Gallienum missis. Obiit A. C. 273. regni 31. Pollio de 30. tyrannis, Agathias, Eusebius, etc. Claudian. l. 2. in Eutropium v. 491.

------ Socium nobis fidumque Saporem

Perculit, et Persas in regia vulnera movit.

Ita locum istum restituit doctissimus Nicolaus Heinsius. Nomen erat plerisque regibus Persarum commune, uti Caesares Romanis. Sidon. Apollinar. Panegyrico Aviti:

------ Parthicus ultro

Restituit mea signa Sapor.

Eum excepit Ormisdates vel Hormisdates I. quem vide.